主页 > 大事外域 >耐过行出禁区 拖累乘客罚钱！ 香港机场等行李 愈来愈慢之谜 >
耐过行出禁区 拖累乘客罚钱！ 香港机场等行李 愈来愈慢之谜
2020-07-31
你有无试过，开开心心去完一趟旅行，返到香港衰收尾所有好心情都被破坏晒，原因竟然係因为等行李等劲耐？我谂，唔止阿珍一个人试过啰！
文：杜游珍
香港机场 行李运送排名急跌香港机场负评多已经唔係新鲜事，都唔好提竟然将禁区变做IFC咁得番贵价名牌店嘞，最正中港人要害，係要香港人久等吖嘛！香港人出名无耐性，要开开心心去完旅行嘅港客围着行李转盘呆企揿手机等行李，实在是大罪！Skytrax每年调查嘅「全球最佳机场」排行榜，在运送行李方面的评分，香港机场由2015年排名全球第2急跌至2016年排第8，等行李等到火滚，绝对唔係老屈！
嬲嬲嘅唔止普罗大众乘客，连任贤齐早前都在微博发火，暗串喺香港机场等咗一粒钟行李，而且不是第一次，吁机场「要加油」或者增加人手！发文翌日，小齐仲收到机管局亲自电话问候，最终小齐都打圆场话自己唔应该未了解就发火，不过佢就无删到post啰！
除咗小齐忍唔住投诉，阿珍身边有不下一个朋友试过，因为等行李等得太久，错失尾班车要改坐兜更远路的机场巴士甚或局搭的士，亦曾听闻有个客因为等极都等唔到行李，迟过12点先出到禁区，还迟咗Wi-Fi蛋被罚多一日租金！无情情唔係自己嘅错但要罚钱，唔嬲就假！
好多网上讨论区都讨论过点解行李会愈等愈耐，有人归咎机场愈来愈多廉航阻碍了行李运送效率，但亦有心水清机场职工爆料，劲迟出行李终极原因，係因为唔够人手做「地牢」（即係行李落机后运回大楼的处理部门），人手不足加上新增了中场客运廊，尽做都做唔切。
回应久等行李的指控，香港机场最近推出全新服务「行李通」，将RFID技术结合要畀钱买的行李牌，售价分为普通版$30及皮革版$90，各大新闻网都直抄press release话只要将行李牌跟手机App连接，行李到埗收到通知，就可以「不用呆等行李」！阿珍睇完新闻搲爆头，点解加个行李牌可以唔使呆等？行李会出快咗咩？
阿珍日前更在SCMP睇到一篇报道，行李延误情况最严重嘅，主要係用紧中场客运廊嘅航班（包括香港航空同HK Express），原来机场刚在暑假才开始兴建长达2公里的行李输送带连接主大楼及中场客运廊，预计要起一年半，即係要18个月后先有机会改善？OMG！
报道中仲提及，机场的处理行李能力，原来分最快送达及最迟全部送达：2016/17年度，首件行李在20分钟内送出转盘，平均达成有96.8%；至于在40分钟内完全送达行李的比率，原来都有96.6%，照咁讲，小齐等足一小时，即係嗰不幸嘅3.4%啰。
除非你无寄舱行李，在转盘等行李是无可避免的事，以下4个Don’ts，各位千祈唔好做，见到别人咁做最好避之则吉，不然令人燥底之余亦眼火爆！
久等行李已经够燥，见到港人大陆客将架行李车片埋嚟再队入黄线，立即无名火起！最憎有人愈行愈前，遮挡其他人睇行李转到未，好心，拜託，文明啲好唔好！
其实阿珍真係唔明，行李转盘咁多位可以攞行李，偏偏大家都好锺意逼在行李由地牢升上嚟嘅出口位，讲真，等咗咁耐，都唔争在呢个身位啦！
即使已经攞番行李，行李箧上的Barcode都唔应该立即搣，虽然香港好少帮乘客核对行李，但外地有机场要对清楚先畀你带走个箧，最起码过咗海关先搣都唔迟。
阿珍都知大家去旅行好开心买好多嘢，返到香港立即分赃拎返屋企最直接方便，但可唔可以唔阻住行人通道呢？其实行李大堂都有好多位置可以唔阻别人㗎喎！
延伸阅读：香草好食过港航！ 飞机餐达人教路 空中饮食都可Upgrade
上一篇：耐磨、耐髒、耐重还不够！ Angelia Pets 全新系
下一篇：耐震校园护安全 国震中心10年补强逾8千校舍
